Berdevkê Kremlînê: Amerîka piştevaniya xwepêşandanên neyasayî dike
Berdevkê Serokatiya Rûsyayê (Kremlîn), Amerîka bi piştevaniya xwepêşandanên li Rûsyayê tometbar kir û got, Amerîka “destwerdanê di karûbarên navxwe de dike.”
Li Moskow û çendîn bajarên din ên Rûsyayê ev çend roj in xwepêşandanên mezin birêve diçin.
Alîgirên Alexei Navalny ku serkirdeyê opozisyonê ye û çalakvanekî aktîv ê dijberê Vladimir Putîn e û çend roj berê piştî vegera xwe ya ji Almanyayê ji aliyê polîsê Rûsyayê ve hat desteserkirin, daketin qadan û daxwaza azadkirina Navalny kirin.
Di xwepêşandanan de bêserûberî û alozî çê bûn û roja Şemiyê di xwepêşandanan de nêzikî 3 hezar û 500 xwepêşander ji aliyê polis ve hatin desteserkirin.
Piştî wan bûyeran jî, Balyozxaneya Amerîkayê ya li Moskowê daxuyaniyek belav kir û tê de daxwaz ji Amerîkiyên rûniştvanên wî welatî kir neçine cihên qelebalix û herwiha amaje bi wê jî kir, Amerîka piştevanî li xwepêşandanên aştiyane û azadiya raderbirînê li Rûsyayê dike.
Vê helwesta Balyozxanya Amerîkayê ya li Moskowê, Kremlîn hêrs kir û Berdevkê Kremlînê Dimitry Peskov, Amerîkayê bi “hewldana bo têkdana rewşa Rûsyayê û destwerdana di karûbarên navxwe de” tawanbar kir.
Peskov di hevpeyvîna bi televîzyoneke Amerîkayê re, got: Amerîka bi aşkere piştevaniya binpêkirina yasayên Rûsyayê û karên rêpênedayî dike.
