Parlamenter û Berdevka Meclîsa Ciwanan a HDP'yê Dêrsim Dag, li Parlamentoya Tirkiyê li ser pirsgirêkên ciwanan ên aborî, civakî û perwerdehîyê axivî û got: “Ji ber polîtîkayên AKP û MHP'yê ciwan naxwazin li Tirkiyê bijîn û koçî welatên din dikin.”

Dêrsim Dagê bal kişand ser vê yekê ku divê ciwan bê hêvî nebin û ji Tirkiyê koç nekin û got, ew dê bo ciwanan bibin hêvî û dawî li polîtîkayên desthilatê bînin.

Berdevka Meclîsa Ciwanan a HDP'yê got: “Ciwan naxwazin li Tirkiyeya ku AKP û MHP bidesthilat in bijîn. %73ê ciwanan dixwazin ji Tirkiyê koç bikin. Wate ji her 4 ciwanan 3 kes naxwazin li Tirkiyê bijîn. Banga me bo ciwanan ew e. Bê hêvî nebin û ji Tirkiyê neçin ji ber em bo we hêvî ne. Di demeke nêzîk de em dê desthilatê biguherînin û em dê sîstema ku ciwan di rêveberiyê de bin ava bikin. Em dê bi hevre desthilata ku em neçarî hejarî û birçîbûnê kirine têk bidin. Li dijî kesên ciwanan bêkar dihêlin em dê qadên kar ava bikin. Li dijî wan kesên ku kujerên jinan diparêzin em dê Peymana Stenbolê cîbicîh bikin.”