Wezîrê Tendirustiyê yê Tirkiyê Fahrettin Koca ragihand, hejmara kesên ku li wî welatî bi sedema vîrusa Koronayê jiyana xwe ji dest dane, gihîşte 4 kesan.

Fahrettin Koca têkildarî hejmara tûşbûyî û qurbaniyên Vîrûsa Koronayê li Tirkiyê, li rûpela xwe ya twitterê ragihand, ku di heyama 24 saetên dawiyê de li Tirkiyê jineke 85 salî ji ber vîrusa COVID-19 canê xwe ji dest daye û hejmara qurbaniyên vê nexweşiyê li welatê wî gihîştiye 4 kesan.

Wezîrê Tendirûstiyê yê Tirkiyê dibêje, testa vîrusa Koronayê ser 1981 kesan hatiye kirin û di encamê de derketiye holê ku 168 kesên din bi wê vîrusê ketine û niha hejmara kesên ku li wî welatî bi vîrusa Koronayê ketine, gihîşte 359 kesan.

Hikûmeta Tirkiyê ji bo girtina pêşîya Vîrûsa Koronayê, planek amade kiriye û zêdetir ji 15.5 milyar dolar bo wê armancê terxan kiriye.

Roja 10ê Adarê hikûmeta Tirkiyê yekemîn haleta tûşbûna bi vîrusa Koronayê ragihandibû.