Hêzên parastina kampa Holê ya bakura rojhilata Sûriyê, ku girtiyên DAIŞê tê de ne, hewleka jinên DAIŞê ku dixwestin agir bi kampê bixin, pûç kirin û 3 jinên DAIŞê jî girtin.

Yek ji berpirsên hêzên ewlekariyê yên parastina kampa Holê ya Hesekê ragihand, wan agahî girtibûn ku jinên DAIŞî ku ji Tirkiyê ne, hinek benzîn û derman di xîvetên xwe de kom dikin û amadekariyê dikin ku agir bi kampê bixin da ku tevliheviyê derxin û birevin.

Wî berpirsî tekez kir ku wan telefon bi jinên girtî re dîtin û bi rêya nameyan zanîn ku têkiliya wan bi şaneyên DAIŞê yên li Tirkiyê û Sûriyê re hene.

Di kampa Holê de zêdetirî 67 hezar koçber û penaber hene, her wiha zêdetirî 40 hezar kes ji malbatên çeteyên DAIŞê yên ji Sûriye, Iraq û biyanî hene.

Heta niha çend caran girtiyên DAIŞê hewl dane ji kampa Holê birevin û xwe bigihînin hêzên Tirkiyê, lê tevahiya pilanên wan hatine pûçkirin.