Sîyasetvanê navdar ê Kurd ji Kurdistana Tirkîyê, piştî hevdîtina digel Cîgirê Serokwezîrê Herêma Kurdistanê, çû mezargeha Celal Talebanî xîmdarê Yekitîya Niştîmanî ya Kurdistanê (YNK) û Serokomarê berê yê Iraqê.

Osman Baydemir Şaredarê berê yê Amedê û Parlimanterê Kurd, ku seredana Herêma Kurdistanê kirîye, piştî hevdîtina digel Serokê PDK û Serokê Herêma Kurdistanê li Hewlêrê, çû Silêmanîyê û bi Cîgirê Serokwezîrê Herêma Kurdistanê û Endamê Civata Rêvebirîya YNK Qubad Talebanî re hevdîtin pêk anî.

Osman Baydemir û Qubad Talebanî di wê hevdîtinê de derbarê rewşa navçê û nemaze Kurdan axivîn û pêgirî ser bikaranîna rêyên dîplomatîk û gotûbêjê jibo çareserkirina pirsgirêkan û bidestxistina mafên Kurdan kirin.

Baydemir çû mezargeha Celal Talebanî jî û li wir di daxûyanîyekê de got ku Mam Celal roleke girîng di alûgurên herêmê de lîstîye û hertim faktora pêkanîna aştîyê bûye û rêyên dîplomatîk û mentiqî jibo çareserkirina pirsgirêkan bikar dianîn.

Hatîye gotin ku armanca seredana Osman Baydemir a Herêma Kurdistanê gotûbêja digel rayedar û rêvebirên sîyasî yên vê navçeyê derheq bidestxistina nexşerêyekê jibo çareserkirina pirsgirêka Kurdan li herêmê ye.