Balafirên cengê yên Tîpa 14`an a artêşa Iraqê, pêgeh û veşartgehên endamên DAIŞ`ê li bilindiyên Qereçûxê li rojavaya Hewlêr dan ber bombeyan.

Li gorî rapora NRT`yê li dû dewama livûtevgerên endamên DAIŞ`ê li bilindiyên Qereçûxê ku ketiye navçeya Mexmûrê li başûrê rojavaya Hewlêrê, balafirên cengê yên Tîpa 14`an a artêşa Iraqê, pêgeh û veşartgehên DAIŞ`ê yên li vê çiyayê bi giranî dan ber bombeyan.

Xazî Feysel, yek ji fermandeyên Pêşmerge yên li navçê ragihand ku Tîpa 14`an a artêşa Iraqê, ji hefteya buhurî ve li vê navçeyê û li gundê Gulî Elî Reşê ku polîsê federal lê bicih bûye, bicih bibû û eva yekemîn karê wan a dijî DAIŞ`ê piştî bicihbûna li navçê ye.

Eva li halekê ye ku berî niha veşartgehên DAIŞ`ê yên li Qere Çûxê ji aliyê balafirên cengê yên Hevalbendiya Navnetewî ya Dijî DAIŞ`ê dihatine bombebarankirin lê ji 26 rojên buhurî ve ev êriş hatine sekinandin.

Anegorî nûçeyê gundên vê navçeyê ku ser bi Mexmûrê tê hesêb bûye cihê livûtevgerên terorîstî yên DAIŞ`ê û heya niha tu karek ji bo paqijkirina van navçeyan nehatiye kirin.