Medvedev: Ne dûr e Rûsya jî sermiyanên biyanî yên li welêt bicemidîne
Cîgirê serokê Meclisa Ewlehiyê ya Rûsyayê Dmîtrî Medvedev got heke sermiyanên Rûsyayê yên li derve hatin cemidandin, ew jî dê mal û milkên biyanî yên li Rûsyayê bicemidînin.
Dmîtrî Medvedev got ne dûr e Rûsya dest deyne ser mal û milkên dewletên dijberî Moskowê, heke sermiyanên Rûsyayê werin cemidandin û Moskow dê bi rêya cemidandina sermiyanên welatî û şîrketên biyanî yên li Rûsyayê bersivê bide cemidandina sermiyanên Rûsyayê yên li derve.
Li gorî ajansa Sputnîk, Medvedev wiha got: “Ew bi rêya vê yekê me ditirsînin. Em ê bi heman rêbazê bersiva wan bidin.”
Yekitiya Ewropayê (YE) îro Dmîtrî Medvedev, serokwezîrê Rûsyayê Mikhail Mishustin, wezîrê karên hundir Vladimir Koloskoltsev û nûnerê taybet ê serokê Rûsyayê yê kar û barên parastina jîngehê Sergey Ivanov xistin lîsteya cezayan.
Wezareta Gencîneyê ya Amerîkyê înê ragihand ku Washington ji ber aloziya Ukraynayê ceza li serokê Rûsyayê Vladimîr Pûtîn û wezîrê karên derve Sergey Lavrov ferz kiriye.
