Navenda Çand û Hunerê ya Minbicê kesên ku dewreya muzîk, stran, nivîsa bi xeta erebî û wênesaziyê bi dawî kir, xelat kirin.

Li gorî rapora ajansa nûçeyan a Hawar Newsê (ANHA), Şahiya derçûnê îro li hola Komîteya Çand û Hunerê ya li başûrê Minbicê hat lidarxistin û bi dehan şêniyên bajêr û nûnerên Rêveberiya Sivîl a Demokratîk a Minbic û Gundewarên Wê beşdar bûn.

30 xwendekar beşdarî dewreyê bûn ku 8 mehan dewam kir.

Cîgira Komîteya Çand û Hunerê Zeyneb El-Hemo îşaret bi girîngiya hunerê di parastina çanda gelan de kir û got: “Nivîsandin, muzîk, wênesazî û stranbêjî çandek e ku divê em xwe fêr bikin û biparêzin. Xeta nivîsandinê hunereke xweşik e ku girîngîdayîna ziman nîşan dide, muzîk jî zimanê gelan e.”

Kesên ku dewre bi dawî kiriye, gelek tabloyên ku xêz kirin û nivîsên bi xetên erebî û gelek awaz û stranên gelêrî pêşkêş kirin.

Di dawiya şahiyê de, Komîteya Çand û Hunerê beşdarên dewreyê xelat kirin.