Di opêrasyona Çîyayê Cûdîyê da 8 leşkerên Tirkîyê hatin kuştinê artêşa vî welatî di şerê 21 rojî yê dijî PKK li Kurdistana Iraqê da jî serkevtî nebûye, lewma fermandeyên leşkerî biryar dan ku zorê bidin ser Kurdistana Tirkîyê.

Piştî ku 8 serbazên Tirkîyê di encama opêrasyona li Çîyayê Cûdîyê da hatin kuştinê, fermandeyên leşkerî yên vî welatî li Şirnexê di civîneke awarte da biryar dan ku şerê li Kurdistana Tirkîyê dijwar bikin.

Ligorî agahîyên nefermî jî seredana Silêman Soylu Wezîrê Karên Hundur ê Tirkîyê bo Şirnexê jibo seredana leşkerên birîndar ên di opêrasyona Çîyayê Cûdîyê da bike, di rastîyê da jibo pişikdarîya di wê civîna awarte da bûye.

Ligorî çavkanîyên herêmî, Serfermandarê Jandirmeyên Tirkîyê Arif Çetin yek ji serokên hoza Babatê bi navê Hezîm Babat ku niştecihê Enqerê ye jibo alîkarîyê anîye herêmê. Babat berî vîya jî di opêrasyona dijî PKK da li herêmê bi Çetin ra hevkarî kiribû.

Şayanî gotinê ye ku hefteya buhurî hin hêzên gundparêz li Kurdistana Tirkîyê bi nîşana nerazîbûna himberî opêrasyona vî welatî li Kurdistana Iraqê, çekên xwe danîn.