Nûnerê taybet yê Amerîka bo Sûriyê James Jeffrey sibê serdana Tirkiyê dike. Di rojevê de herêma qaşo aram ya li bakurê Suriyê û vekişîna hêzên Amerîkî hene.

Di demên dawî de, hatûçûna şandên Amerîkî û Tirkiyê zêde dibe. Piştî serdana Wezîrê Bergirîyê yê Tirkiyê û Şêwirmend û Zavayê Trump Jared Kushner û şandên serbazî, sibê jî Nûnerê Taybet yê Amerîkayê serdana Enqerê dike.

Li gor agahiyan, Jeffrey sibê bi şanda bi serperiştiya Cîgirê Wezîrê Derve Sedat Onal û rayedarên serbazî re dê bicive.

Şanda serbazî ya Amerîkî 28'ê Sibatê serdana Tirkiyê kir û bi rayedarên serbazî yên Tirkiyê re civiya û derbarê plana vekişîna hêzên Amerîkî, rewşa Minbic û rojhelatê Feratê û avakirina herêma qaşo Aram gotûbêj kiribûn.

Amerîka di 19ê meha Kanûna 2018an biryara vekişandina hêzên xwe ji Sûriyê da, lê di piştre got ew ê 200 leşkerên xwe li rojhilatê Firatê bihêlin.