Rojnameyeka çapa Tirkîyê aşkira kir ku Partiya Demokratîk a Gelan HDP û Hikûmeta Tirkiyê piştî demek dirêj civîyan.

Nivîskarê rojnameya Hurriyetê Abdulkadîr Selvî ku kesek nêzikê hikûmeta Tirkiyê ye, dibêje ku di navbera HDP û Hikûmeta Tirkiyê de piştî demek dirêj hevdîtin pêk hatîye.

Li gorî vê raporê, Hevseroka HDP`ê Perwîn Buldan û Parlementerê heman partiyê Mîthat Sancar serdana Serokê Fraksiyona AKP`ê Nacî Bostanci kirine. Serokê Fraksiyona AKP`ê jî, ji bo nermbûna zimanê siyasetê girîngî daye serdana Perwîn Buldanê.

Nivîskarê rojnameya Hurriyetê Abdulkadîr Selvî serdana HDP`ê girîng dibîne. Li gor wî HDP piştî ku biryar daye li  bajarên mezin ên Tirkiyê beşdarê hilbijartinan nabe, serdana AKP`ê kiriye.

Perwîn Buldan jî hevdîtinê piştrast dike, lê amajeya nivîskarê rojnameya Hurriyetê Abdulkadîr Selvî red dike.

Buldan dibêje ew digel Nacî Bostanci têkildarî zext û zordariyên li ser HDP`ê û ewlekariya pêvajoya hilbijartinê axifîne û daxwaz kirine ku operasyon û zextên dijî HDP`ê  bi dawî werin. Dema hevdîtinê tesadûf e û ew di derbarê hilbijartinê de li dijî AKP`ê zelal in. Di hevdîtinê de ji xeynî van mijaran wan ser tişteke din qise nekirîye.

HDP ragihandibû ku ew ji bo şaredariya 3 bajarên Tirkiyê yên wekî Stenbol, Edene û Îzmîrê ku li van bajaran xwedî sedan hezar deng e namzetan diyar nake. 

Medyaya nêzikê AKP`ê jî nerazîbûneka tûnd li dijî vê biryara HDP`ê nîşan dabû û ragihandibû ku di navbera HDP û CHP`ê de rêkeftineke nehênî heye.