El-Sîsî der barê aloziya avê de hişyarî li ser pêkanîna nakokiyê da
Serokkomarê Misirê Ebdulfetah El-Sîsî piştî bêencambûna danûstandinên bi Etiyopyayê re yên têkildarî bendava El-Nehzeyê hişyarî da ku dê herêm çi berdêlî bide, heke nakokî li ser avê çêbûn.
Piştî bêencambûna danûstandinên der barê bendava El-Nehzeyê de ya bi Etiyopyayê re, serokkomarê Misirê Ebdulfetah El-Sîsî duh careke din bang li Etiyopyayê kir ku têkildarî bendava El-Nehzeyê hevkar be. Her wiha hişyarî da ku dê herêm çi berdêlî bide, heke nakokî li ser avê çêbûn.
El-Sîsî got: “Em û birayên xwe yên Sûdanê li hemberî helwesta Etiyopyayê ya ji bendava El-Nehzeyê re hevkar in. Di dema bê de Misir, Sûdan û li ser astên erebî û afrîqî dê helwestên cidî li hemberî vê mijarê nîşan bidin. Ev yek dadmendiya helwestên Misir û Sûdanê piştrast dikin.”
El-Sîsî destnîşan kir ku her du welatan dê bi tevahiya rêbazan û li gorî qanûnên navneteweyî û qanûnên herikîna avê yên navneteweyî mafên Misir û Sudanê misoger bikin.
El-Sîsî di xîtabê xwe de diyar kir ku helwesta Misirê ji vê dozê nayê guhertin û ew wek serokê Misirê rêzê ji helwestên gelan re yên ji bo pêşketinê digire.
El-Sîsî da xuyakirin ku wî ev helwesta xwe di axaftina xwe de ya li parlamenta Etiyopyayê de sala 2015`an nîşan dabû. Lê Etiyopyayê nêrîna xwe li ser vê doze guhartiye.
