Mesrûr Barzanî: Divê hemî alî rêzê li serwerî û sînorên Herêma Kurdistanê bigirin
Serokwezîrê Herêma Kurdistana Iraqê di hevdîtina digel Balyozê Tirkîyê de pêgirî kir ku divê hemî alî rêzê li serwerî û sînorên Herêma Kurdistanê bigirin.
Ligorî daxûyanîya Serokwezîrtîya Herêma Kurdistanê, Serokwezîrê Herêma Kurdistanê Mesrûr Barzanî û Balyozê Tirkîyê li Iraqê Fatih Yildiz di hevdîtinekê de derbarê peywendîyên dualî yên di navbera Herêma Kurdistanê û Tirkîyê de gotûbêj kirin.
Barzanî di wê hevdîtinê de pêgirî ser daxwaza Herêma Kurdistanê jibo pêşxistina peywendîyên digel Tirkîyê yên di hemî waran nemaze di warên cotkarî, pêşe û geştyarîyê de bi armanca kêmkirina hewcedarîya Herêma Kurdistanê bi derhatên niftê kir û got ku Herêma Kurdistanê bi dû zemînesazîya guncav jibo karirina berhemîner û sermayeguzarên navxweyî û derveyî ye.
Ligorî daxûyanîya Serokwezîrtîya Herêma Kurdistanê, Mesrûr Barzanî nerazîbûna xwe ji ber pevçûnên di navbera Tirkîyê û PKK`ê li deverên sînorî yên Herêma Kurdistanê de ku di encama wan de welatîyên sivîl dibin qurbanî nîşan da û pêgirî kir ku divê hemî alî rêzê li serwerîya Herêma Kurdistanê bigirin û nebin sedema zîyan û xisarê jibo welatîyên Herêma Kurdistanê.
Wî di pişkeke din a vê hevdîtinê de xwest ku hêsankarîyên zêdetir jibo seredana dualî di navera Herêma Kurdistanê û Tirkîyê de bên berçavgirtinê û pirsgirêkên welatîyên Herêma Kurdistanê dema seredana bo Tirkîyê li balafirgehên vî welatî bên çareserkirinê.
Ligorî rapora Malpera Nûçan a Xendanê jî, Balyozê Tirkîyê li Iraqê Fatih Yildiz bi Alîkarê Serokwezîrê Herêma Kurdistanê Qubad Talebanî re jî civîyaye û her du alîyan di wê hevdîtinê de pêgirî ser berfirekirin û xurtkirina peywendîyên dualî kirin.
